هؤلاء الذين نحبهم
كى يصلونا بجسد الحياه ..
يكونون هم أول من يفصلنا عنها
داريــــــــــــل
......................................
إلى ....
أميمه عبد الشافـِـى ـ صفـِـاء عبد العال ـ أحمد عبد الجبار ( طبعاً ! ) ـ أحمد مصيلحى
لولاكم كانت الحياه أصعب من كده
॥ عبد الرحيم يوسف
قصايد ماتت بالسكته القلبيه !
¯قلبك بيبرق فـِـ ركن الصوره
وانا قاعد جنب الشباك المقفــول
شامم ريحة الموت فـِـ كل حاجه
والضلمه بتنفـخ فـِـ الأوضه
لحد ما تبقى بالونه سودا كبيره
باتمرجح جوّاها !
¯الصرخه اللي كان ممكن تكسر الإزاز
وتلم الخلق فـِـ الشارع
ماتت ع المنديل
واستحالت لنقطة دم بتفـرش
وبتاخد شكل بصمه ... مجهوله !
¯ح الاقيها فِـين ؟
بحر الطحينه اللي عملته
خدها ..
وساب لي طوقها فـِـ ايدي
وكرسيها فـاضي جنبي
لا الجرسون عايز يشيله
ولا قادر اقعّد حد مكانها !
¯خلّصت الرعب !
وبقيت اصبّح ع العفـريت
اللي يقابلني ع السلم !
وازاحم اللي يزاحمني فـِـ الأوتوبيس
واسحب الغطا منهم بالليل
واضحك على عيونهم الحمرا
ونيابهم الزرقا
ودموع اكتشافـهم الفـاجع
إني بقيت زيّي....زيّهم !
¯لو سمحتي...
إنتي قفـلتي قلبك على صوبعي !
افـتحيه شويه
علشان نور ربنا يدخل
وتشوفـي أثر جريمتك !
¯الناس خفـت !
بس الدوشه ما راحتش..
والعيون اللي ما بتشوفـش غير نفـسها
لسه شايفاها !
إمتى اخف انا كمان
وما اشوفـش غير نفـسي !
¯الوحده ....اكتشاف لذيذ !
لكن الكتابه المستمره لنفـسك
بتفـسد المتعه !
¯التكرار.....ما بيعلمكيش حاجه !
والتجربه بتثبت لي
إني مدرس فـاشل !
¯لو تعرف باحبها قد إيه !
واني علّقت عليها كل أحلامي
وظبّطت دنيتي على مقاسها
..لكن المشكله
إنها عارفـه باحبها قد إيه !
¯
باكره كل الناس..
وفـِـ غيابها
...باكرهني !
¯بدأت اضعف
وخلقي يضيق..ونفـسي يقصر
محتاج اسكت شويه
لحد ما عرقي ينشف
وتقومي م النوم !
¯صباح الخير !
أنا قمت م النوم..ووشي اتفـرد
حد عايزني !
صورتك اللي ما رضيتيش تدّيهالي ؟
حصّالتك اللي مالهاش مفـتاح ؟
ضحكتك البخيله؟
قلبك المفـتوح ع العالم والمردود قدّامي ؟
أىّ حاجه !
معقوله نمت السنين دي كلها !
¯عبدالوهاب مستقصدني !
مع إني باحبه والله
رغم أنف كل صحابي .....وحبيبتي!
يكونشي هو السبب
فـِـ فـشلي فـِـ الحياه !
¯حجه بليده
محتاجه برهان إضافـي
عشان المسأله تتحل..
لأ بقى !
دانا محتاج حجه تانيه !
¯الدفـا اللي بتسّربهولك إزازة البيره
قبل ما تخلص
محتاج دعم..
بس انت مفـلّس خالص
ومضطر تكتفـي بهذا القدر..كالعاده !
¯الولاد الطيبين
بيحاصروني بالأسئله
"إنت خاطب يا أستاذ ؟"
"طب اسمها إيه ؟"
"معاك صورتها ؟ "
وانا مش ناقص !
¯الشعر مش جايب معاك..
ضيّعته زىّ ما لقيت كل حاجه !
والقلم اللي فـِـ إيدك
بقى أكبر دليل
على استمرارك فـِـ الجريمه..
¯اللمون ناقص سكر يا صاحبي
والصحبه مابقيتش قادره
تحلّي المراره اللي جوّايا..
باينّي حمِضت ولاّ إيه ! !
¯صفـحه جديده بافـتحها
وكلي أمل ابقى جديد انا كمان..
بس المشكله
إن الخيال..والكلام..والتعب..
قديم جدا !
سامحوني..
¯مش عارف تخلص للحظه واحده
ولا قادر تفـرّق نفـسك بالتساوي
قدّام تغيّر الفـصول
وعاجز عن إنك تنسحب م السبق
... مشكلتك أكبر مني !
¯"يا إخوتي "
أنا باراهن على ضياعكم
وهو حاصل !
وباشمت فـِـ دموعكم الي لسه ح تنزل
ومش بابكي عليكم !
¯لمّا تشوفـها
إبقى سلّملي عليها..
وقول لها إني لسه بافـكّر فـِـ مُوتَـه
تليق بيها....وبيّ !
¯عيون العالم مفـتوحه
على كل احتمالات الدمار والحياه
وانا..
مش شايف غيرك !
¯سَـبَتْ نازل من آخر دور
بيعاكس حبال الغسيل فـِـ كل بلكونه
وبيعايرها بحريته فـِـ النزول والطلوع
وهو ناسي إنه مربوط بحبل
فـِـ إيد واحده بتستخدمه كل ما تحتاجه
وبتنساه بقيّة اليوم !
¯قرَِِِِِِِّبت انساكي !
والدليل على كده
إني بدأت ارمّز ليكي
وكأنك مالكيش وجود فـعلي..
الخطوه الجايه
إني انسى الرمز كمان..
وابطّل كتابه !
¯الدخّان عبّق المكان
وحمدي زيدان واحشني !
زمانه دلوقتي غرقان فـِـ الدخّان
.. وبيفـتكرني !!
¯سيبولي فـرصه
أشرح لكم ازّاي بقيت كده..
مش ح اكلّفـكم أكتر من مشوار
لحد عندها..
معذور..مش كده !
¯فـلت م الدموع بأعجوبه !
بس اللئيمه شافـتني وانا باهرب منها
ورغم سرعة البديهه
وحسن الحظ
والميكروباص الطاير ع البحر
حاسس بشالها بيرفـرف
وهي متشعلقه فـِـ العربيه من ورا
... وبتضحك !
¯وردة الكريستال
طارت م الفـازه الفـقيره
ورشقت نفـسها فـِـ عروة قميص حرير
بيهفـهف فـِـ الريح
ويحنّس قلبك السكران
بريحتها الكدّابه !
¯كلنا فـِـ الهم شرقانين !
وكوباية الميه أبعد م الجنه
والأحلام.. مابتشبّعش
طب ماتيجوا نعملها ..ونخلص !
¯الحاجه الوحيده اللي محسساني اني غني
إني باكتب على نفـقتي الخاصه..
وبعد دا كله
تقولولي انها كتابه فـقيره !
..طظ فـيكم !
¯سطرين كمان والنبي !
نفـسي احس اني أكبر م الظروف
والوقت..ودفـقة الشعور..
مش ممكن كل شئ يخلص
بالسرعه دي !
¯جميل الكورنيش الجديد!
والعالم الفـارغ من بشر بيحبوك
وبتحبهم
والبيت الضايع
وهي..وهي بعيده عنك !
السبت1مارس
الأحد 2مارس 2003 (مقهى الفـردوس
.................................
يافـجر الشاعر
لو صدّق نفـسه
ويا بخته
لو كان كدّاب بالفـِـطره !
¯لو عدّيتي قدّامي دلوقت
وعنيكي فـِـ عينيا
مش ح تعرفـيني !
حتى لو ابتسمتلك
زىّ زمان !
لإني عجّزت قوي
فـِـ اليومين اللي فـاتوا !
¯أنا اخترت أبعد مكان عن خيالهم
وقعدت فـِـ آخر ركن
ممكن تلقطه الاضاءه -الهاديه أساساً -
وسبت الساكس يشوف شغله
ويطلّعهم من جوّايا
زىّ التعابين !
¯عايز اخلّص علبة سجايري
قبل ما اروّح..
عشان ما اسمحش لحد
يشاركني وحدتي...معاكي !
¯ح يغنّوا لحد إمتى !
أكيد ح يزهقوا
ويتأكدوا اني أطرش بالفـعل
ويمشوا..
ويسيبوني اكمّل غنوتي..فـِـ سرّي !
¯أصحاب المكان
لطاف فـعلاً !
جابولي القهوه ..واختفـوا !
متهيألي انهم روّحوا
وقفـلوا الباب من برّه
وسابولي المزيـكا
أدفـع لها الحساب..لما احب اقوم
وتنضّف المكان من دموعي
وتفـقل الباب ..وتروّح
وهي بتفـيّد م التعب !
¯الميّه بتتهز ليه ؟
مع إني ثابت شويّه النهارده
ورعشتي مش ملحوظه
والجو مش بارد للدرجه دي..
يا ترى مين عكّرها
وكتب اسمه عليها
ومش عارفـه تدوّبه !
¯إله الخجل
نسى يحط لمسته الضروريه
على نسختك الأخيره..
وسابك تدوسي على مشاعري
بالبراءه دي كلها !
¯الشاشه سودا
والأشباح بتتحرك بحريه
وبتمارس حياتها العاديه
وهي مش قلقانه من وجودي
فـِـ الشاشه السودا
اللي قصادها !
¯كوباية لبن بالعسل
وساندوتش جبنه "كيري"
وبطانيتي القديمه ع الكنبه "الاستوديو"
ورواية "الحرافـيش"
وقبل دول كلهم
حضن أمي..
يقدروا يغيّروا العالم
دلوقتي !
¯قلبي اللي دبحتيه بردّك المراوغ
فـضل متلصم بدموع احساسك بالذنب
لحد ما اكتشف انها دموع ضحكتك المكتومه
..بقى حتتين لحم ميّت
بيعوموا فـِـ الدموع !
¯الجو اتقلب فـجأه
بعدما كنت بدأت افـهمه..
حتى الشوارع اللي مامشيتش فـيها من سنين
رافـضه تستوعبني
وكلابها الجديده..مش عارفـاني !
السكّه مش واسعه يا "حمدي"..
..أنا اللي ضيّق !
¯دمعه بترقص
فـِـ مرايه اصفـرّت
وملتها بقع الشمس السودا..
وانا بعبطي
مصمم امسحها
من ع الوش اللي فـِـ المرايه !
¯الصور بتخايلني وانا ماشي
فـاروّح جري
عشان الحق اسجّلها
وع بال ما اوصل
يكون نصها وقع
وبقيتها.. تخسر مني
..تخسر
¯تقدر تنام
وفـِـ قلبك شادر مليان..
إنت فـيه المعزّي
واللي بيوّزع القهوه
واللي بياخد العزا !
الأحد 2مارس
الاثنين 3مارس (مقهى السكريه )
........................................
لسه فـيه شوية حزن فـِـ شنطتك
ياللا..
طلّعهم همّا كمان !
وانفـخ فـِـيهم لحد ما يملوا عينيك
ويزاحمونا فـِـ القعده..
أيوه..ماهي ناقصاك !
¯ما تزهقش بسرعه كده !
واستحمل اختيارك للآخر ..
إنت كبرت ع الدموع .. والتردد
وورقك شاب من قلة الفـرح ..
حاول تستمع شويّه
بإحساسك الجديد إنك مش محتاج لحد
وان العالم دلوقت..بقى أجمل بكتير !
¯زمانها نايمه
وعلى شفـايفـها ابتسامة طفـل برئ
مش حاسس بدموع الورده
اللي قطّعها..وهو بيلعب !
¯الأحزان الكبيره
مش قابله للدوبان
الأحزان الكبيره
مفـطوره ع الكمون !
¯لمّا تخلص الهدنه
ح تكون المعركه انتهت فـعلاً
..بهزيمتك المعتاده !
¯الراجل اللي قدّامك
ما أجرمش عشان تشخط فـيه كده !
وإيه ذنب السيجاره
عشان تحدفـها بالعنف دا كله ؟
..فـكّر مرتين قبل ما تعمل أىّ حاجه
ولاحظ إنك متشتت ..بجد !
¯عباية جدّي..واسمه
همّا كل اللي ورثته منه..
ليه ما خدتش طوله..وعرضه
وقدرته ع الموت ..فـِـ الوقت المناسب !
¯إيه اللي خلاّكي تمسخي الحكايه
وتسفـي الشريط
قبل ما تخلص أول غنوه
غير إني قلتلك باحبّك
قبل ما اشوفـك..كلك !
الثلاثاء 4 مارس
الأربعاء 5 مارس (مقـهى المحروسه)
¯يعني إيه بحر أزرق غطيس
وسما بهتانه
ماسكه فـِـ ديل الشمس
اللي غابت من أكتر من ساعه..
وهلال ضعيف
ويصعب ع الكافـر !
..فـيه حد بيلعب فـِـ الكون
..فيه حد بيضحك علىّ !
¯على فـِـكره..
إنتي ما بتموتيش
وانا ما بانساش
واحنا الاتنين..كدّابين !
¯مش حابب ابرّأ نفـسي
وارمي الذنب ع الوجود كله..
فـِـيه فـخ اتنصب م البدايه
ومشيت له وانا مفـتّح..
ودي مش غفـله
...دي جريمه !!
¯ح يركن كتفـه على أقرب ورده
ويضحك لمّا تزغزغه بشوكها
ويمسح نقط الدم من على ورقها بخجل
لاحسن يجرح إحساسها !
¯الخطوط مشغوله..
وانا محتاج دلوقتي لكتابه واضحه
تقدر تتحدى وقاحة العالم
ومهرجانات الكدب والخيانه
اللي خطفـاني بألعابها الناريّه
وبناتها البريئه
وإخراجها المتقن ..
ومحسساني بعجز غريب
واني يادوبك....بافـِـك الخط !
¯فـوانيس مصدّيه
متعلّقه فـِـ جيوب الحنين
وداير يعرضها ع الزباين
المشغولين بالطاوله
والحوارات الجانبيه
وآخر الأنباء...
بتدوّر على مين يا غلبان !
تعالى..تعالى
أنا زبونك الليله دي !
الاثنين 10مارس
الثلاثاء 11مارس (مقهى السكريه )
¯الغربه جنبك..حكايه !
وبعيد عنك..مأساه
وفـِـ كل الحالات
أنا استويت !
¯بعيده...زىّ الفـرح !
وأجمل من خيالي المريض
وأقسى م القدر
..أمّال انا حبّيتك ليه !!
¯نسيت اتخلّص من ريحتك
وانا باهرب من عـنيكي..
عملت حساب الذكريات
واللحظات الخاصه
ووجودك الأبدي فـِـ قصايدي
وحددت لهم مواعيد هجومهم
واستسلامي...
لكن مافـيش خطه كامله !
وانتي زيّ عوايدك
أشطر مني !
¯كمّلت الألبوم
بصوره لك فـِـ الوضع يائساً !
غريبه..!!
طب فـِـرّ معايا بقية الصور
بذمّتك..شايف فـرق ؟!
¯ح احتاج ألف ليله
ما يشبهوش لبعض
عشان انسى طعم كلامك الماسخ
...اللي باحبّه !
¯كان لازم اكون أذكى من كده
والاحظ م البدايه
إنكِ بتجري ورا الجزره المربوطه فـِـ عصايه
وبتدهسي القلب اللي يقع قدّامك..
بس انا صدّقت كلام صلاح جاهين
ونطّيت لفـوق..عشان اطولك
ومانبنيش
إلا الوقوع على جدور رقبتي..
وساعتها بس افـتكرت
إنه مات بفـعل الفـشل !
ياللا ..
الله يرحمه..ويرحمنا !
¯ح تبان بأنهي وش !
ومين ح يصدّق ملامحك الجديده
غير بشر ماشافـوكش قبل كده
وعالم فـقد الذاكره
وابتدا م الصفـر
زيّك...تمام !
¯هو لازم يبقى فـِـيه مزّيكا
عشان الستاير تخف !
ومين يقدر يبدّل ريحته كل ساعه
عشان يتوّه الذكريات !
¯قبل ما يخلص اليوم
خد لك حاجه عدله من أتره !
..دقيقه نسيتها فـِـيها
.. ضحكه طالعه من قلبك
..فـِـكره ح تحاول تثبتها بكره
..معنى واقف على حيله
شهوه لأيّ شئ
غير إنك تشوفـها
قبل ما يخلص اليوم !
الأربعاء 12مارس
الخميس 13مارس (فـندق فـلامنكو –القاهره )
¯اتكعبلت فـِـيكي فـِـ نص الحلم
جيت امسك إيديكي
فـلّــتِّـيها..
مسكت فـِـ ديلك..
يا تقوّميني
يا ح اعرّيكي !
¯أكيد فـِـيه لحظات طيبه
ح تبادلك الحب..
وهيّ..مش شريره للدرجه دي
وانت..مش ملاك..
وع بال ما تتقابلوا
ح تكون الشجره نشفـت
والتعابين اللي جوّاها ...ماتت !
¯فـاهم كلام الحكيم المتحنّط ؟
ولاّ بتضحك على عقلك بنص فـِـكره !
ولاّبتطاوع روحك الشريره
وتقول ان الكاس الوسخ
ماتتشربش منه ميّه نضيفَـه !
¯بقى لك مدّه ما بتكدبيش..
إيه!
ناويه تدبلي أكتر من كده !
¯مادام فـِـيه تلج فـِـ الكوبّايه
وعصفـور مخلص ساكن ساعة الحيطه
وشنطه بتشيل الكتب الحكيمه..والمشلوله
وأغاني بتعوّر..
ح تفـضلي موجوده !
¯قطمت لقمه واحده
وقمت..
لأ !
أنا مش جعان..
أنا ح اموت م الجوع !
¯بدل ما يزرع فـخ للسعاده
ويستفـيد من تجاربه السابقه
استحرم يشوفـها مكانه..
وسابها تجري منه
...لفـخ تاني !
¯أجرمت فـِـ حقك !
حقك عليّ..
أوعدك المرّه الجايه
أكون أوعى من كده
وامشي على قانون المزّيكا المودرن
واسيبك ترقصي على كيفـِـك
على رتمي...أنا !
الاثنين17مارس (مدرسة أبيس 8 ع م
................................................
¯بالراحه عليّ شويه !
أنا ما اخصش حد..
واللي نفـِـسه فـِـ حاجه ياخدها
- لو لقى! -
أنا فـرّقت روحي على أيام كدّابه
ووشوش فـاجره
وأجبن م الحقيقه ..
واللي فـاضل فـِـ إيدى ورق ضعيف
باكشفـهـــلكم زيّ لاعب مبتدئ
وارميه ع الترابيزه ..واضحك
زيّ أيّ بطل مهزوم..
واقول لكم اللي انتو عارفـينه
: " الموت...يكسب..!"
الثلاثاء 25 مارس (الحضره)
¯خلّي المظاهرات للأبطال
وعبيد الثوره..
وسيبيني اذاكر فـِـ الخيانات الصغيّره
واخطط لقلب نظام الحكم
فـِـ قلبي !
وابقى انا الديكتاتور الوحيد..
عشان لمّا اتلقى رصاصات محبتكم الزايفـه
تبقى عن حق !
¯اسكندريّه الجميله
هربت منّي للكتب
والتواريخ
والشوارع اللي ما اعرفـهاش !
وسابت لي اسكندريّه المجرمه
اللي ما اعرفـش غيرها !!
¯أصعب من صحياني الصبح
والتبات و النبات
والقعده مع اللي كانوا صحابي
ودهشة المعرفـه..
إني ابص لنفـسي فـِـ المرايه
أكتر من عشر ثواني ..
من غير ما اخاف !
الخميس27مارس (الحضره)
¯العمر اللي كنت فـاكره بيت
طلع مبني بالدومينو
ومع أول لمسه منك
إتهد من حواليّ
ومافـاضلش فـِـ إيدي غير..بلاطه !
¯لسه مستمتع بالصدمه
وكأنه شوكه رنّانه
بتتهز من جوّه ..
حتى وهو قاعد
وحاطط رجل على رجل
وبيتكلّم عن قيمة الثبات..ع الموقف !
الأحد 30مارس (العجمي)
¯النهارده 31مارس
والشتا لسّه راجع بضهره
وبيسألني نفـس السؤال بتاع الولد بيّاع المناديل
- "أمّال فـِـين البت اللي كانت معاك !؟ "
- يا عم كبّر..!
ما هي راحت معاك
وساعات بتعمل زيّك..
وترجعلي بضهرها !
¯حالة التوازن دي
ما بتجيـلكش الا وانت لوحدك..
ساعتها بتحب الناس..وتسامحهم
لكن..مابتغفـِـرلهمش !!
الاثنين 31مارس (الحضره)
¯بسرعة البرق
لضم الخيطين من ورا رقبتي
ورجّعهم حبل واحد
سابهولي فـِـ إيدي .. وابتسم
..ومشي !
وانا واقف ابص ببق مفـتوح
وعقل عطلان
ونفـس مسدوده..
وسؤال بيتمرجح جوّايا:
أنط الحبل ؟
ولاّ اعمله مشنقه !
¯فـِـيه حدود لكل حاجه !
وهو استحملك كتير
وانت بتهمله شويّه!
وتقل أدبك عليه شويتين !
وتتاقل عليه طول الوقت..
فـكان منطقي ان أول ما تدوّر وشّك
وتتلهي فـِـ ضل تاني
يتسحّب بالراحه..ويختفـي !
وسواء كان دلوقتي بيغنّي..ولاّ بيعيّط
ولاّبيتفـلق..مالكش دعوه !
سيبه يخلق ضل تاني على قدّه
واعتمد شويّه بقى على نفـسك !
¯أفـتكر آن الأوان تعرفـي
إني شلت البخور من حوالين صورتك
وعلّقت عليها شريط ساتان اسود
وبقيت كل ما اشوفـِـك
أمصمص شفـايفـي
واقول..يخلق من الشبه اربعين !!
¯لسّه ماشي دلوقتي حالا !
حتى سيجارته لسّه بتطلّع دخّان فـِـ الطفـايه !
وجوز الوطاويط اللي دخلوا معاه
رايحين جايين من حيطه لحيطه
مش عارفـِـين يخرجوا ..
خدهم معاك ينوبك ثواب !
وقول له يبطّل يسيب روايحه فـِـ المكان
وبعد كده لو زار..يخف !
¯ ح اوقّفـِـ النزيف ان شالله بطوبه !
واسند قلبي بإيدي حتى !!
واقطع الأنابيب اللي رابطاني بيكم
واجري فـِـ الممر حافـي..ونص عريان
واستغل بطء الملايكه
ودهشة الشياطين
وافـلت م البوّابه...
وقدّام المبنى بالظبط
ح ادوّر
أحدف الطوبه فـِـ اليافـطه الإزاز
..وانفـجر !
الأحد 6 أبريل ( الحضره )
¯الجرح اللي يلم بسرعه كده
يقلق !
وحاجه من اتنين:
يا انت بتكدب على نفـسك
يا إما مت ...فـِـعلاً !
¯شوفـِـي يا ستّي ..
قدّامك سكّتين بالعدد
السكّه القصيّره..ما توصّلش
والسكّه الطويله..ح تتعبك
أمّا النقطه السودا اللي فـِـ النص
فـغالبا ح تكون قلبك اللي ح يتحرق
من كتر دورانه فـِـ عجلة الروليت
والخط الاسود الطويل دا..طابور عشاقك
والقلب الاسود اللي واقف بعيد
مش خارج م الطابور
دا كان فـاكر نفـسه طابور لوحده
وفـِـضل متجمد ع الوضع ده
لحد ما غطّاه التراب
وكنسته الأيام...
كفـِـايه كده !
عينيا زغللت..ووجعتني !
¯لمّا بيموتوا
بنفـضل فـتره مش مصدّقين
لحد ما نتعوّد- من غير ما نحس – على إن وجودهم ما بينّا..وهم !
وكل ما يحاولوا يأكدوا لنا انهم عايشين
نشد الغطا حوالينا كويّس
ونستعيذ بالله من الشيطان
..وتخاريف الأموات !
¯مش بسهوله ح تعرف اللي جوّاك !
خصوصا وانت متقّل كده
ولافـِـف الكوفـِـيّه على قلبك!
واضح ان نزلة البرد اللي فـاتت
خلّتك تنفـخ فـِـ الزبادي!
¯عايز اقلدك
وابص لك بنص عين..
تشوفـِـيها لطشة غرور
واشوفـها آخر حدود احتمالي !
¯قعد يعيّط
بعد ما قضّى نص عمره يشب
عشان يطول العروسه اللي فـوق الكرسي
لحد ما شاف يمامه بيضا ع الشباك
طلع يجري عليها....طارت (طبعاً ! )
وطبعاً كان طول شويّه !
ولمّا انحنى يعيّط تاني
لمح ورده بترقص ع الإفـِـريز المبلول (مش بدموعه على فـِـكره ! )
وقبل ما يدلدل إيده
إفـتكر العروسه..واليمامه..ومعاد الشغل
قفـل الشباك ونزل جري
قبل ما ياخدوه غياب !
الأحد 6 أبريل (أبيس8 )
¯بنيّه صافـيه
وقلب طاهر
قعد يوضّب لهم المقلب
اللي ح يخلّيهم يحبّوه..أكتر !
¯مش ح اغلب فـِـ شكل جديد للحزن !
أنا ابن التراث الكبير م الكآبه
والتكنولوجيا العفـريته..
ورافـِـع شعار "الوحده..هي الطبيعه"
و"بكره كله...فـاني !"
¯عايزه منّي حاجه تاني !
أظن اني عملت اللي عليّ
ووصّلتك للنقطه اللي انتي عايزاها
ومافـِـيش لزوم للدموع واللجلجه..
ماتبوّظيش المشهد على آخر لحظه
وخلّيني اتعوّد اسلّم على أعدائي
بابتسامه عريضه
وإيد بارده
من غير ما اعد صوابعي بعدها...
ماشي ؟!
الاثنين7أبريل 2003 (الحضره
..............................................
ديوان عاميه للشاعر السكندري
عبدالرحيم يوسف
صادر عن مطبوعات يدويه
