Tuesday, January 12, 2010

زي ما اكون بتكلم جد .. جمال حراجي

الهيئة العامة لقصور الثقافة

سلسة إبداعات العدد 126

زي ما اكون بتكلم جد

لـ جمال حراجي

الطبعة الأولى 2000

..............................

الديوان 115 صفحه

مقسوم جزئين

الجزء الأول 4 قصايد

مقاطع

يمكن تكون البقعه دم

حد الحصار

مشغول ع الآخر

الجزء التاني 27 قصيده

يمكن ترجع تاني

بروفه أخيره

يادوب رسمه

لازم تخرج فورا

طاقه

روح خفيفه جدا

لحظه واحده يمكن نتقابل

النهارده انت عريس

ليله سريه جدا

عيل ميت من قبل ماييجي الدنيا

واحد سكران

زي ما اكون بتكلم جد

تسنيم

مؤكد ح أعملها في يوم

سوء حظ

مجنون

حاجه تقصر العمر

تلاتين سنه وما رجعتش

لقطه مش للذكرى

زي ما انت كده

خرايط للتذكار

برواز قديم

مع ان روحه ما طلعتش

كان ممكن أصحى

وكأنها بتعدي المانش

آخر رقصة ديسكو

باقي الأشياء اللي أنا متعود عليها

...........................................

الإهداء

إلى تسنيم ابنتي

أول تأويل الرؤى وأصدقها

وإلى عفاف أصل التأويل

إلى الوجوه الطيبه التي علمتني الكتابه

- أبي وأمي .. بدايات الحلم

- أهلي في " قفط " .. و" نجع مُعين "

ودفء الإسماعيله الحنون !

إهداء خاص

- إلى الشاعر الكبير عبد الرحمن الأبنودي

تواصلا مع ماقدمتموه من إبداع

- أنتم الأصول التي لايمكن نسيانها

علمتمونا التجديد .. والنظر إلى أعلى

والتمرد .. وكسر الملل !

فهل تقبل مني هذه التجربه ؟!

الجزء الأول أربع قصايد من تجربه أولى

مقاطع

مربوط على درجه مش ميري

ولحد الصبح المش مضمون

عليا وعلى غيري

أنا باجري في دايره

والدايره بتجري لغيري

* * *

ح استخبى جوا عينيكي

وما تبصيش

واقلع كل هدومي وأعيط

يمكن أعيش الذكرى الدافيه

واتخلص من خوفي لبكره

ويمكن أكره صورتي العاكسه

بره عنيكي

وأخرج بشويش

وما تحسيش

* * *

كانت واقفه هناك

على ناصية شارع

مش معروف

بتعد الداخل والخارج

من لحمي الميت

طب ح أعمل إيه

لما تسيبي روحي وأنزف

واتبعتر كلي في دمك

ح توافقي تلمي دموعي

من على خدك

ولا ح تسيبي لغيرك .. دمي .

...........................................

يمكن تكون البقعه دم

طالع من الزهره

ولا كنت في السيما

الموت مالوش قيمه

لو ح تهتف

وتكسر إشاره

تحت الممر وتعدي

وسط اندهاش العسكري

واللخبطه في اللون

الأحمر الدموي

فيلفك الصمت القديم

ويهددك بصوتك الممنوع

وينزعك م الملعب الأموي

فتقعد على الدكه احتياطي

وتكتم الضحكه

أو تدوب تحت الرصيف

فتكسر إشاره من تاني

وتطرطق ودانك

لصفارة العسكري

وتعمل مش مهتم

وتعدي م الألوفات

تقف مبهور على

طرف حبل المشنقه

وتشد روحك

من كتاب المدرسه

ومن نشيد اتمنع من الحفظ

فتغافل العسكري

وترمي نفسك من جديد

تحت الممر ..

نفس العيوب والوسوسه

يمكن تكون البقعه دم

أو تكون هلوسة

طالع من الزهره

ولا كنت في الكتاب

حاولت تهرب من دوار البحر

وتخلص حروفك م الهجايه

ومن بدايه بترسمك

خريطه ع الورق

دلتا ونهر ..

وبحر مزوغ من حصص

التاريخ

ومن الوصايا العشر

طالع من المنفى ..

ولا بتخاف من المطرا

الموت في جلدك بيعيد

تفاصيل المداين

والقبل ع الشفاه

وبيغافل الحراس

طالع من الزهره

ولا من قلوب الناس .

......................................

حدّ الحصار

إلى روح الشهيد عمر الفرك

أحد شهداء الاسماعيليه في 67

من المدرسه الثانوي لحد باب الجيش

كنت بتلم الخطاوي في مريله م الخيش

وفي ضفيرة بنت سايبه أمرها لله

وبتعد الليالي - للي مابيجيش -

كان النهارده كام في شهرنا العربي

وكام من شهور الجيش

وازاي ح نحفظ الأرقام

ما دمنا زي ما بنعيش نموت

وانت الوحيد سهران

مع ضي نجمه على شط القنال

تحدف جرايتك للسمك والملح

يمكن تنفع اللقمه في ليالي الجوع

أو تغسل الميه صديد الجرح

كانوا العيال في حارة الشهدا

بيلعبوا عسكر وحراميه

يلموا الشوارع م الدمار

ويستخبوا في الكوره الشراب

يحركوا قلب الكبار

ويفرغوا المدينه من الأغراب

يهتفوا باسمك جماعة على حد الحصار

ويقلبوا الموازين في غمضة عين

ليحنوا إلى رؤياك

ويعدوا إليك بالقرابين

ويحملوك دموع الأنبياء

وشفاعة الخارجين من ديار الأوليا

ويستخبوا في جلدك من دانات النار

ومن خجل الممات في الحيّا .

........................................

مشغول ع الآخر !!

مشغول ع الآخر

وموزع نفسك

سواطير الخلق

في باب اللوق

كان محتاجلك

تحت الرايه

لما داريت دموعك منه

وسبته يشد الحبل لوحده

ويهتف لبقعة دم

كبرت فجأه في صدره

بكره الجرنال يكتب عني

وواحد معرفوش

هيعيط على صورتي

كنت بتخاف ليشوفك

وانت بتعد قروشك خلسه

تحت التنده

وتتدارى في أتوبيس النقل العام

ليردك تاني للفقر والعوزه

بالتأكيد غلطان في العنوان

مبقاش محتاج

لا لخوفك منه - ولا لمدة إيدك في الضلمه

ودس قروشك من عرق

الناس في جيوبه

مبقاش محتاج

للرايه البيضا

المكتوبه بخط ردئ

ولا لحبل يدوب في صوابعه

ولا لعطف البهوات على عجزه

بكره مكانه ح تشيله البلديه

وتحط بداله عسكري دوريه

يمارس نفس الدور بغباء

وتعدي عليه

وانت مشغول ع الآخر .

..............................................

الجزء التاني قصايد جديده .. نوعا .. ما

يمكن ترجع تاني

كانت قدام الفترينه

بتعد قزايز البرفان

وبتحسب في الأسعار

لما خرجت بوشك من

تحت البرواز

شديت على إيدها بحرقه

كانت عايزه تبوسك

ومنعتها العربيه البودره

على الناحيه التانيه من التلتوار

ولأنك مابتعرفش تفرق بين

شكل الناس في الزحمه

ماقدرتش تفهم إن

" البليه الدواره طالت منك راق "

استغبيت على قد ماتقدر

وحاولت تستفسر عن أشياء مش مفهومه

ساعتها بس قدرت تقنع نفسك

إن النهايات المفتوحه في الأفلام العصريه

هي الموضه - مش بس فساتين السهره

كان لازم تعرف إنك مش عصري

وإنك متباع على طول الخط

وآهي عندك فرصه

حاول تعتذر عن كام سنه عدت

- ماقدرتش - ويادوب بتحاول

تمد الإيد لوداعها

كانت تاهت في الأسفلت

وكل عربيات الشارع عدت على صدرك

وفضلت لوحدك .. تفاصل في قزازة برفان

هديه - للمره الجايه -

يمكن ترجع تاني

فتحاول تعاتبها وتفهمها

إنك غيرت ملامحك

وبقيت إنسان عصري !!

................................................

بروفه أخيره لـ مجدي الجابري

ما أقدرش أجيلك

ولا أحلم وياك

بسلامة نيه

عن ليله تحت القمرايه

وسواقي بتجر دموعك

لأراضي بور .. تخضّر

كلام وشعر وولاد وبنات

"ماقدرتش" أحجز لك ورده

من بستان مررته بقصد

من تحت صوابعك

ولأصحابك من غير ماتحرف

فيه ولاكلمه

أو حتى تقول لبناتك عن سر

الشجره اللي بتملا حفانها

من طمي النيل ع الكورنيش

وتوديه للفيوم

وتشر عرق طافح على

توب الكستور

ح تصدقني .. لو قلت لك :

قبل السفريه إياها

كنت بافكر أرسم لك " بروفه "أخيره تذكار

وأهديها لوشك تحت البرواز

بس احترت .. أبدأ من فين؟

من آخر بروفه لقصيده جديده

وماعرفتش تنهيها بشكل يرضى جميع النقاد

وتسميها بقصد " الحياة مش بروفه "

ولا من كرهك للضابط..

اللي اتريق على حلم أبوك في القسم

وهو بيتباها "بنبوغك"

في قميص الدمور الخام

وما قدرتش تحقق كل أّماله

في الدبورتين والبدلة الميري

وتعظيم البهوات للباشا

بن على الجابري شاويش دورية أّخر الليل

واخترت طريق الشعر

اللي مالوش أي علاقه

بالصالونات وأصحاب " الجزم " اللميع

وياقات النيلون

وفضّلت الموت وسط أصحابك

ع القهوه غرقان في "البن" الساده

ودخان الكيلوباترا

والشعر "الرمزى" المنثور

اللي مدوّخ نقاد الدرجه الثالثه

فقررت إنك تستسلم للدم

المخنوق في عروقك حتى الموت

ولاّ إنك تسيب " دماغك " لحراس الأطلس

أوتفاح الشيشه على رصيف " قهوة البستان"

اخترت إنك ترحل بدري

من غير أي كلام كنا بدأنا ندق حروفه

شويه شويه تحت التنده

في أتوبيس الشعر "العام"!

طب ليه.. ترحل من غير زفه

أو ضمه ترقص فيها وتحزم

وسط بناتك بالشال الفيومي

وتغني الشعر بدون قافيه

..............................................

يادوب رسمه

الدم المرسوم على أسفلت الشارع

مكتوب بعنايه

قلب وسهم يادوب بيلامس

أول خط في الرسمه

على الرغم من كتر الرجلين

اللي بتدهس في الشكل

لسه الحروف واخده مضمون " الدم "

وبارزه زي حجاره في معبد فرعوني

محتاجه لحد يفك رموزها..

وحتى اللحظه الفاصله..

كنت "بافكر" إزاي قدروا

اثنين : بني أّدمين"مش عفاريت

يساوموا الأسفلت الجاف

ويخلوه يشاركهم فرحتهم

"بالدم" المنزوع من صوابعهم

وما يرفضش .. ولا يقلب وشه

فتضيع كل ملاحهم

ويبقوا يدوب رسمه على

وش الأسفلت.

..........................................

لازم تخرج فورا

في مكان مناسب جدا

تحت سقف الروح

تقدر ترفع صوتك بالغنا

تقدر تفاصل في الحروف

تركب سلم المقامات

واحده.. واحده

وتشاور على أصعب

جملة تجيلك زحف

في مكان مناسب جدا

تقدر تحلم..

باللب نفسك فيه من زمان

وماقدرتش تبوح!!

تسهر ليلاتي

مع عواد من جيلك

وكمناجتي بيوجع رأس

الشارع طول الليل!

على قد الكلمه الصافيه

الطالعه بجد من قلبك

تقدر تتمدد على ضهر المجد

وتخالف كل النقاد المتفقين

في الرؤيا معاك

تحضر حفله سخيفه

على شرف الغنوه

التايهة في جلدك

من أيام الهجرة الأولى!!

تعمل سرحان

لما مذيع الحفله

يقدم دورك على كل الحاضرين

تعتذر بلباقه

عن كلمة ترحيب مبتوره

وتبدلها بالشكر لفناجين القهوه

ولأصحاب الدعوة

اللي مفيش بينك ولا بينهم أي كلام

تقعد في نفس مكانك سرحان

ح تعدى على جثة مين

تحت السجاده "العجمي"

وح تشرب دمك في الكاس الجاي

وتغرق في " البويه " وضحك الستات"

كان لازم تخرج فورا

بره أكيد..مكان مناسب جدا

للتفكير..

يمكن تقدر تعيد حساباتك

من تاني.

.......................................

طاقه

الطاقه اللي كنت بتبص

منها على العيال

وهما بيلعبوا الكورة الشراب

في شوارع منشية الشهدا*

وكنت بتشجعهم بحرقة

وانت يدوب وشك باين

من الفتحة الضيقة وباقي جسمك

مدفون بين الحيطان القديمة

نفس الطاقة انهدمت واتقام

مكانها "برج"سكنوه الغواني

ومليونيرات فتارين "سعد زغلول"**

والحارة الضيقة أكلها الشارع في التنظيم

ومفضلش منها غير كشك بيبيع السجاير

المستوردةوالميه المعدنية

للعيال الحريفه اللي كسبوا في أّخر

جولة م الكورة الشراب

وغيروا أرض الملعب فجأة

لحتة تانيه ممنوع فيها

حد يبص عليهم

أو حتى يشجعهم

من فتحة "طاقة"قديمة

بتطل على شارع واسع

من شوارع منشية الشهداء

.........................................

روح خفيفه جدا

الراجل العجوز اللي بيستنى يوماتي

القطر القشاش على

شريط السكه الحديد

اختفى فجأه

وماعدش بيسأل حد

عن أسباب تأخير قطارات

الدرجه الثالثه

وتكسير شبابيك العربيات

الخربانه

وشتيمة الكمسري للركاب

مع أنه كان امبارح بس

بيلم ضلوعه من على شريط

القطر ويعبى عضامه في كيس

بلاستيك ويخبى وشه بورقه

جرنال قديمه عشان مايشفش

الناس وهي بتتفرج على خفة روحه

وهي بتطير في السما لجل ما تلحق

كرسي

في آخر عربيه في

القطر القشاش

.............................................

لحظه واحده ممكن نتقابل إلى مجدي حسين

لحظه .. ويتبدل المانشيت في الجرنال

من الأحمر الدموي .. للإسود القاتم

لحظه .. ويكتروا المعذبين في شاشة التليفزيون

من غير مقرئين أو قهوه ساده

أو بنت صغيره مموته نفسها من العياط

لحظه واحده .. ويقوم مجدي يحكيلها حدوته

فتنام !!

وقبل ما يطفي نور الأوضه

يحل نفسه من كل الارتباطات

اللي وعد أصحابه بيها ع القهوه

وما قدرش يوفي

لحظه ويحمل أوراقه وكل كتاباته

اللي مازالت مسودات

ويحاول يلحق أول كرسي في الدرجه التالته

في قطر كان مستنيه من مده

ويشخبط على كل العناوين الباهته

اللي اختارها زمان

ويغير في الترتيب ويبدل لغته المعتاده

عيّل وعملها .. ما قدرش يبص في عيون

أصحابه القداما .. ولا قدر يبرر لهم

موقفه المش واضح من شعر التفعيله

لحظه ويقف القطر وينزل لمحطه بدون يافطه

ويكملوا هما .. ح يقابله شخص ما يعرفهوش

ويسلمه كل اللي معاه .. مقابل " لحظه " واحده

يتقابل فيها مع نفسه " من غير أصحاب "

أو شعر أو بنت " صغيره " محتاجه لحدوته عشان تنام !!

.............................................................

النهارده .. انت عريس

ابتسم انت النهارده عريس

سيب دماغك تحت اللحاف

وامشي على قد رجليك ما تمشيك

ح ترسيك على بر أكيد

أو البر يرسى عليك

مش مهم .. المهم إنك تبتسم

وكل اللي ممكن تعمله

إنك تفتح بقك 180 درجه

وتطرد صف سنانك على قد ما تقدر

لقدام ..

كده تبقى بتضحك ضحكه كبيره

وما حدش يقدر يحسب عليك

عدد الضحك في اليوم الواحد

ويصوروا وشك في الجرايد

وينشروك على إزاز الفتارين

مش مهم يكتبوا إيه عليه

المهم إنك تبان في الصوره

وانت بتضحك

وعشان ماتحافظ على ضحكتك

ما تقراش جرايد ولا تتفرج على تليفزيون

ولا تكتب " كلام " يعكر مزاج

اللي بإيدهم الأمر

مش مهم " التمن "

ح تدفعه انت

أو يدفعه غيرك

أو تآخده بالتقسيط من بنك الضحك الوطني

إشرب من النيل أو القنال

أو أي ترعه قميئه تقابلك

وانت مروح لعيالك آخر الليل

إطوح على قد ما تقدر

وإعمل إنك سكران

ح تعدي على جثث كل

اللي قابلتهم امبارح

وح تضحك من قلبك

لما تلاقي نفسك

واحد " عريان " من كل حاجه

ووحيد بين أربع جدران

وقتها بس .. ممكن تبتسم

وممكن كمان تلبس بدله جديده

وتحلق شعرك ع الموضه

وتقعد في الكوشه لوحدك

ولو طلع عليك الصبح !!

ممكن تصرخ صرخه كبيره يتجمع حواليك كل الناس

وقتها ممكن تطلب منهم وانت بتضحك

كلمة " مبروك " مش ح يستغربوا

أو يقولوا عليك مجنون

لأنك إنت النهارده عريس

فابتسم !!

....................................................

ليله سريه جدا

تحت تنده - في موقف أتوبيس النقل العام

رغم معرفته بمكانه اللي المفروض

كان هيروحه من عشرين سنه

كان بيسأل على آخر أتوبيس

ورغم الإجابات المبتوره

من كل اللي قابلهم

إلا إنه مُصر يعرف

آخر أتوبيس ح يجي امتى

وح يروح فين ؟

ومازلات " البت الخمريه " المتعلقه

في دراعه الشمال

بتترجاه إنه يديها الوصفه السحريه

لقضاء ليلة راس السنه

في العشه الصفيح

تحت الهرم الأكبر

أو يتنازل عن إصراره المجنون

ويقضي معاها ليله سريه جدا.

........................................

عيل ميت من قبل ما ييجي الدنيا

 

 

 

 

 

 

Wednesday, January 6, 2010

مشاهد من دنيا صغيره .. مجدي عطيه

الهيئة العامة لقصور الثقافة
اقليم القناة وسيناء
فرع ثقافة السويس
ديوان : مشاهد من دنيا صغيرة
للشاعر : مجدى عطية
2002

المقدمة

امى صاحبة الكرامات والادعية
والبيت اللى من غير مادنه
والقدرة العجيبة فى تفسير احلام المريدين
اللى نسيو يبنو لها المقام
اكتفو بتحويش الشمع
بيقدموه لى باعتبارى واحد م الورثة
بيقرا وياهم على روحها الفاتحة
ولابويا
صاحب اشهر عكازين فى العيلة
سابهم لولاده كميراث مايفيدش
غير فى حالات العجز والشيخوخه
كمان صحابى الملايكة
اللى بعد نص الليل مابيدروش بحاجة
غير ان الرصيف بيظبط خطواتهم
يسلمهم للسرير
ولبنت تشبه مدينة
ماقدرتش تستوعب احلامها
اجبرتها تسلم ادوات الماكياج
وتختفى وراء الاضواء

ريجسير

واد مكلف بتوزيع الاوردر
على ابطال الفيلم الجاى
سقطت منه العناوين فى قطر السويس
قام وزع على صحابه كل الادوار
باستثنا دور حجزه لنفسه
ادا لمثله الاعلى دور البطولة
مع انه ما يستحقهاش
ابتدت عينه تخرج
تصور فى مشاهد
الواد بتمسمره قصايده على باب الدكان
لسه مشغول بتراب وميه
وعجينة طين بتشكل فى قصيدته الكون
سادد بيها باب القبر
قافل على نفسه
سايب طلسم وحجاب على صدر صاحبه
اللى غرق فى البحر
وسهران على القهوة صباحى
بيراقب روحه اللى بتهرب على جناح بومة
ناصب لها المصيدة فى اول القهوة
على كرسى فاضى
ومابتقعش فى مشهد
دخله عيل دوره اساسى
بيرسم فى الصحرا بيوت وشوارع
وماكينة شعر بتطبع وشه بالالوان
على بيت مكسور زى بيوت عجرود
الريجسير عينه بتحدد الزوايا
بيثبت الكادر
ع العنصر النسائى الضعيف
مافيش غير بنت بتحكى حواديت خايبه
بتمثل كل الادوار المطلوبة
الطيبة و الشريرة ، الهانم والخدامه
وفى اخر الفيلم بتترمى لتمساح مغلوب على امره
بيقلب على نفسه الحدوته
طالب المدد
من صاحبه اللى خد دور مؤثر
بيسرق بيه الاضواء بالعافية
مش راضى بدوره
مهدد بوقف التصوير
والطعن فى الريجسير التافه
اللى واخد الدنيا لف على كعوب رجليه
وصعبان على عيل رافض يتصور معاهم
مكتفى بتوزيع قصايده
ماشى عينه بتوقع صور ناقصه
ودبلة فى صباعه مهزوزة
بتشده م العياط تدخله حارة سد
مافيهاش غير دور وحيد
لفلاح متحرر
بيشبك ايديه
يطلع كل صحابه يهزو له شجرة التوت
يسيبهم رهن لفرع ناشف
ويلم بواقى التوت الساقط ع الكورنيش
حاليا :-
كل المشاهد بتفرض نفسها

للعرض القادم ع الريجسير
اللى قفل شباك الحجز ع الابطال الحقيقيين
وموزع ادوارهم على صحابه الكومبارس
وبيكتب فى نهاية الفيلم.

ابو سكينه

كل المشاريب سكت على نفسها
نامت على صوت ضحك
اكبر من تلاته كوكو
مابيشربوش اللبن ، مابيناموش بدرى
بيتصدرو القهوة بتلات كراسى
ويستعدوا لتسميع نفسهم عياط جاى
يعلنو المبادئ اللى قامت عليها قهوة ابو سكينة
واستقلالها عن باقى القهاوى بيطلبو مشاريب باردة
ويفرقوها ع الشارع
بمناسبة عيد قومى لقهوة
رافعة شعار الترس والشيشه
وزياراتهم المتكررة
لشرح بطولات الشهدا فى الاماكن العامة
لكشف الاسباب الحقيقيه لموتهم المستمر
ومطالبتهم الملحة لاستعادة كوكو الرابع
من منفاه فى دكانه
السهرة دخلت فى تلاته وربع
بتخرج النفس الاخير
القهوجية بيسلموهم لبعض
ترجع فى المارك الزايد
تطبق الكراسى والبنى ادمين
وتلم الحساب بعد انهزام تالتهم
اللى بيدارى كسوفه
وينام متغطى بضحك الزباين
من تانى
اتنين كوكو فاقدين الوعى
بيصحوا فى الشيشة النار
فاتحين صدرهم
فارضين نفسهم ع القعدة
ناويين على سهرة صباحى
يخترعو فيها بيوت وصحاب وشوارع
يوزعو النضال بافيهات طازة
لمزيد من التفاصيل
الاتصال بابو سكينة
اللى بيربط ما بين الفقرات
ويفرفش القعدة برقصة بلدى
وبيتنازل مجانا عن نص المشاريب.

سُمعه الاقرع

شايف على كتفه ابطال الفيلم
بيضحى بسمعته ما بين الفتوات
مالهوش غير انه ينضرب وبس
وغيره ياخد تسقيف حاد
لحد مايزهق من متفرجين
فاكرين انه يقدر يشيل الجبل يرميه البحر
الكومبارس
بيرفع نجوم بتقتله فى نهاية المشهد
متمدد ع الارض
بيرفص برجليه قدام كاميرا بتعمل زووم
من كل الزوايا
عشان توضح تعبير الموت على وشه
وازاى بيبتسم
مودع الحياه من زاوية صغيرة
راضى فيها عن نفسه
محير النجوم باداء ما فيهوش تكلف
ونفسه يبقى زى الكومبارس الشهير ( سمعة الاقرع )
يحلق حواجبه ، ينفخ عضلاته

يهدد الابطال بمعارك وهمية
لما تبدا حركات عنيفة تسيطر عليه
من هنا ...... يقدر يكتب مزكراته
يرمزلها بنقط طويلة وقصيرة
يرمز لادواره المركبة بعلامات استفهام
وتعجب للدور اللى ما انضربش فيه كويس
يسيب الفواصل مساحة مفتوحة للدهشة
يمكن تطبع جسمه تحت الافيش.

بنت ع الهامش

سايب لحاسة اللمس تقول كلمتها الاخيرة
فى حاجات نفسى احولها لقصيدة نثر
اربع حيطان ، شوية عفش
بنت بتهرب من تكوينها
نفسها تكون ارفع م القلم
يمكن تعرف تكتب حاجات ما قالتهاش لحد
تعفينى من الكلام عنها
فى ديوان ( مشاهد من دنيا صغيرة )
بتعيشها معايا

راكنة فى ايديها الشمال دبلة
وحرف متعلق على صدرها
ميراثها الوحيد من قصة حب قديمة
سنين ضاعت من غير ما تقصد
ردتها للحظة فيها ضحك ودموع
وجمل غرامية
اتقالت فى اماكن مختلفة
بتنام على صوتها
وصوت بيزق الشباك
شايل كوابيس
تنزل بيها الشارع
تتصارع على اكبر ممثلات القصر الملكى
وعارفه ان الغالبية العظمى
نفسهم يوصلو لطرف فستانها
وعينهم بتملاها الرغبة
من ايام ما كانت طفلة بضفاير
لحد حرف ودبلة
بيشكلو عالم
كان نفسها تعيشه بصحيح
عالم بيسند خيالها ع الحيطة
وبيشبع رغبتها
فى الفرجة على احلامها الناقصة.


سهره متعاده

ليه العيال قلقو
مع انهم عارفين ها يخلى بيهم زى مطرب الدغ
بيشبه قعدة ومعازيم
بتنادى مشهد عادى
مافيهوش بطولة
غير لراجل بيوزع مسا
ويلم النقطة
يجور على حق مطرب بيغنى كوبليهات
مافيهاش حرف ال "ر"
يمكن عشمان فى العيال اللى ضاعت

ترجع له امجاده القديمة
فى سهرة متعاده
طب ايه يجبرهم على القعدة
مافيش غير انهم
يقسمو ع القاعدين ضحك مركون من فتره طويله
ويدارو دموع بتدور على مشهد مش مالوف
يادوب بيلحقوه فى فيلم السهرة
ويقومو كالعاده متاخرين ع الشغل.

حبس انفرادى

م الاوضة المركزية لصناعة القصايد
باعلن غضب اتنين وتلاتين قصيده
اتمردو ع الشكل والمضمون
بعد ما اتجاوزو مرحلة الجرى ورا عربية الرش
يمكن اعرف الفرق ما بين الملك والكتابة
ويمكن ما عرفش
اللى اقلام كتير فيها اتقصفت
فى كف بنت يادوب بتفك الخط
بتاخدنى من دنيا عايشها حبس انفرادى
وسايبانى عريان
يمكن اراجع نفسى
اوهب لها صوتى
اللى اضعف من نفس سيجارة
دخانها مش ملكى
زى السما والارض
والبحر و البنى ادمين.

بره التوقيت

ضحك وناس وشوارع ودموع
ايقاع بيفصل بين روحين
ها سيبك تاخد فى العياط راحتك
تاخدنى وتسرح فى الملكوت
نويت اسيبك فى كامل هيئتك
ياريت ماتعرنيش
قبل ما اكتشف مشيتك
الفرق ما بينا قصيده ودنيا
وحبس انفرادى لتانى مرة
لعيل مايستاهلش الكلام عنه
لاتاريخه ولا عيلته اللى قالت واحد واتنين
والتالت فى السكة
تخليه صاحب خيال طازه

وجوده مايحلش غير فى اخر السيجارة
عارف انك لسه ماطرتش
عايزنى اكمل معاك حوار ماكملشى
ها طير عليك دخان زياده
يمكن تختفى ببدلتك الجينز الوحيده
السيجارة ابتدت تخلص
فاسمحلى احطك فى الطفاية.

بلياتشو

بيلف المدينة اللى جنب البحر
على رجل واحده
والتانية مخبيها لباقى المدن
بيرسم خطوط فى شكل شوارع
تفصل مابين اوضته وحدود المدينه
اللى بتطلق البنى ادمين
لنفس الاماكن
يعيدو الحركات المثيره
باستثناء الميعاد الغرامى
اللى بيتعاد للمرة الثانية
مع الفرق فى المساحة
ومسكة الايدين وحركة الشفايف
البلياتشو بينفخ عمدان النور
وينيم المدينة فى خياله
عشان ماحدش يشوفه
وهو بيتخلص من وصايا ابوه
فى ضلمة بتغطيه وقت اللزوم
وضحكته ساعة ما يطوح المدينة
اللى جنب البحر.

لوحة تقليديه للحياه

ها ادى لنفسى الحق
الف الوان مضرة بالنظر
وادخل من الزاوية اللى تعجبنى
هنا
هاعلق لوحة ماحدش هايشوفها
وهى بتغير لون السحاب
والبيوت والناس
حسب نوع الفرجة
هابدا برسم جزمتى
بعد ما ادارى القطع اللى فيها
احولها لمحور رئيسى
تحتها مشاريعى الجاية
اطبق فكرتى عن التجريد
لتلات شياطين محاصرين القهوة
وليلاتى فاردينها كمين
عشان اسلم نفسى بدون مقاومة
ها اسهيهم وارسم باب
يادوب يفوت تابوت امى
اللى كانت بتصارع الحياه
عشان تموت
دلوقتى ممكن اتخيل شكل تانى للجنازة
المشيعين عرايس بتقطع حبالها
تزوغ من اخر الطابور
بس المشكلة الموت ازاى ها ارسمه
هاخليه مساحة بيضا
جنب بيوت شعرها ابيض وعجزت
على سطحها خريطة لحزنى
باهاجر فيها لبنات عريانة
متعلقة على حبل غسيل
وهدومهم على الحبل التانى
بتهرب ويايا للشارع
ها اتخيل ان فيه قوة بتهددنى
اسلم المناظر
وتطالبنى بالتنحى
هارسم على قد ماقدر مظاهرات
ثوار خارجين
اقزام
ولان الالوان الفاتحة بتخلص
فا مفيش غير انى اطرطش على اللوحه
باللون الغامق.

عرض ساذج لابطال كومبارس ومخرج تافه

اعلان عن مخرج مساعد
بطاقته تثبت انه اتعدى سن المراهقه
عمره الافتراضى مانتهاش
مشواره اقصر من كل تجاربى السابقة
عشان يحس انى الوحيد
اللى قدر يبدا م النقطة
اللى ماتو عندها اعدائى
من غير ما اعرف
انهم اكتشفوا مدارس جديده للعبث
شهادة تطعيم ضد جنونى
اللى ها امارسه فى اول بروفة
لانى هاافرد له مساحات كبيرة
يعلن فيها عن نفسه
لايشترط الخبرة
اللى هايكتسبها منى بعدين
زى زمايله السابقين
اللى صبحو اسامى كبيرة
ماقدروش يشيلوها
ونظرا لان العرض كبير
ضامم نخبه من المع نجوم الكومبارس
اتلمو بعناية
ماحدش ها يفهم ايه اللى ها يحصل
ومين ها يخلص على مين
فى دراما حركية
باحذف منها جمل مخله بتعبر عنى
وبتكشفنى م اللحظة الاولى قدام جمهورى
اللى جه يآزرنى فى محنتى
وبيطالبنى برفع الستاره.

المملكه اللى اخر حدودها هامش

انهارت المملكة
اللى كانت فارضة سطوتها على الاف المهمشين
وشهد ميلادها
مجموعة تافهة مش فاهمة حاجة
بتعترض لمجرد الاعتراض
بنظريات سابقة التجهيز
ماقدرتش نفوسهم الضعيفة
ترشيها بحلم مستهلك
تقضى على فلاسفتها الكبار
اللى نظرو لاحزان نثريه
وخطاوى زايده
دفنوها فى اخر الشارع
عشان تكمل الاثاره
اتنباو بخناقة
خلصت على ضحك محبوس جوايا
كنت محوشه للعوزة
ساعة ما اقفل على الدنيا فى اوضتى
اكتب حاجات وهميه
بتنسب نفسها للواقع
وبفتش على عيل فى القصايد
بيقطع كتبه القديمه
اللى هربو مؤلفينها العظام
من اول مواجهه
وسابوه يواجه مصيره
قدام زعامات شعريه
بتشخبط على الورق كلام كبير مش قد كده
وتنصحه يراجع نفسه
قدام مملكة ضاعت هيبتها
عشان اخر اللى فضلوا منها
مركونين فى الهامش


عيد ميلاد

ماليش مطالب
غير ورقة وقلم ، سيجارة وكوباية شاى
يساعدونى فى الهروب من ابويا
اللى رفض يعيد تقييمى
ودفعنى تمن الحداثة
باكتب قصيده فى اللحظة اللى اختارها
يمكن اكتشف مناطق جديده
تزيد من حجم خسارتى
وادين العالم مع اول فرصة
تسمح لى
اقطع ورق النتيجة
ادور على واد مفقود
ماشفتهوش من خمسة يونيه
ودى البداية التافهة
لعالم راكنة
من سته خمسه وستين فى حتة ضلمه
باطلع منه اول حواديت الطفولة
مش عارف الشبه بين النملة والفيل
شايف الدنيا مجرد مريلة بالبسها واقلعها

مشهد قديم

محارب مابيخفش من خياله
بيقتل فى الكمبيوتر عساكر دوريه
حارسه سجن كبير
وعنيها عليه ليهرب م الشاشة
يوماتى نفس المشهد
لصوت طلقات فشنك
وتابوت لطفلة مدفون معاها بالحيا
مرة تجيله
ومرات ما تجيش فى ميعادها
عنيه تقلب فى بنات ماشيه فى الشارع
يمكن تكون نسيت المكان الوهمى اللى هيتقابلوا فيه
وواقف يبص فى الساعه
ع السنين اللى ضيعها من عمره
فى قصة تراجيدى
وميعاد مش هيتكرر تانى
بعد ما تاخر وسابها
تختبر خفة حركتها لاخر مرة
من سطح الجيران
اكتفى تجيله فى خياله

مجرد طفله مسجونه فى تابوت